觀察佢需要咩嘢
有時唔一定送好貴嘅禮物，多啲留意女友需要啲咩，想要啲咩，又或者想食啲咩，對方就會覺得你好貼心，時時刻刻都留意佢，關心佢，自然小小事都會覺得好Sweet。

多啲同對方傾偈
男仔只有喺曖昧期時最多嘢講，之後問佢︰「今日點呀？有咩事發生呀？」，來來去去都係答句︰「咪又係咁。」雖然可能日日都過得大同小異，但女仔好大機會會覺得你咁答佢係敷9衍，話晒大同小異，都仲叫有小異丫，日日點都有啲唔一樣嘅事發生掛？其實唔需要多，每日10分鐘同女友傾下偈，大事又好小事又好，女友在乎嘅係你有冇野同佢分享，從而了解你更多啫。

喺對方會發現嘅地方留低小字條
有時拍拖拍得耐，就會好似老夫老妻咁，未必咁有閒情逸致郁啲就氹對方，講下甜言蜜語；又或者同對方鬧交，想同對方打破僵局又唔知點開口時，都可以用到小字條。只要寫低你想講嘅說話，將小字條放喺平時對方一定會見到嘅地方，令對方無意間睇到咁Warm嘅字條時，實會當堂Sweet到一個點。

喺屋企分出空間畀佢
兩個人一齊耐咗，有機會多咗去對方屋企過夜，如果你可以為女友喺你住所度分出空間畀佢，比如佢嘅「化妝空間」、「私人物品空間」等等，女友會覺得好安心好有歸屬感。

著性感底褲
可能你嘅身材一啲都唔性感，但如果你願意為女友花多啲心思，著下性感底褲氹佢開心，成件事一樣可以好有情趣。

寄明信片畀佢
有時自己出Trip或者同朋友去旅行，不妨寄張當地嘅明信片畀女朋友，會令對方有種「就算我唔喺你身邊，你都會記掛住我」嘅感覺。

不過大前提又係，首先你要有個女朋友囉……