問親啲女人想食咩，最怕就係答你︰「無所謂。」、「是但啦。」、「都可以。」……如果句「無所謂」真係「無所謂」都算，最難頂係次次句「無所謂」都唔係真心，當你答佢︰「咁食M記／茶記／大排檔」時，立即黑你面又得，得咗。不過唔只港女有呢個「無所謂」通病，其實日本妹一樣都有！日本網站mynavi就曾經請251位女性做過一個調查，睇下女性口中嘅「無所謂」有幾成真成成假。

情境題︰當男友問想食咩，曾經答過「無所謂」嗎？

結果估佢唔到，只得39.4%女女答過「無所謂」！至於呢39.4%嘅女女當中，有幾多真係覺得食咩都「無所謂」呢？當中就有87.9%女女係真心覺得係咩都得，而12.1%女女就口不對心，把口話無所謂，實際上就唔係咁諗。

明明實際上就唔係「無所謂」，點解仲要答「無所謂」呢？女女們就話喇︰

1.個人比較「小女人」，想將主導權交畀男方。
2.自己諗唔到食咩，希望男友可以畀啲提議自己揀。
3.懶係就得人，雖然心入面有想食嘅嘢，但都會照講︰「無所謂」。
4.希望男友喺了解自己喜好嘅情況下，好貼心咁選擇自己會喜歡嘅食物。

不過相信對男人而言，除非真係真心無所謂，如果唔係，不如直接講想食乜會更加討人喜歡。