重新解讀他人嘅說法

唔少人嘅惡言攻擊都包含私心，就係因為自己「唔鍾意」、「唔滿意」，又或者妒忌等等心態，講出難聽嘅說話。仲記唔記得N年前有篇港女潮文，話港男對任何靚女都可以挑剔？其實佢哋未必有心，只係因為太常被女性傷害，先會挑剔他人，話佢哋呢樣唔好、嗰樣唔好，透過踩低別人去令自己個心舒服啲。

唔好放喺心

「唔好放喺心」永遠都係講就容易，做就好難，但我哋亦需要慢慢磨練心智，唔好為咗一、兩個批評而忽略其他人嘅支持以及讚美，咁對喜愛我哋嘅人同樣相當唔公平。

沉默

當有人攻擊你，你自不然會好想反駁，但即使你好好解釋，都會有堅持己見唔聽你講嘅人，既然對方永遠覺得自己啱晒，咁你講咩都無用，倒不如沉默唔好理佢，都不失為一種風度。記得曾經有為網民攻擊完我後自我反省，解釋返佢之所以會攻擊我，係因為佢生活上有好多不順心嘅事情，於是就喺網上周圍撩交嗌去發洩，但其實都唔係真心，仲同我講，如果你喺街上見到隻狗亂吠，都唔會同佢去理論啦。

自嘲

當別人嘲笑你去取得快樂，可以見到佢哋係幾咁無禮，將自己嘅快樂建築喺別人嘅痛苦身上。但當你識得自嘲去回應，則可以顯出你嘅智慧同大器，因為只有心胸廣闊嘅人，先識得自我幽默。