雖然好多女人口口聲聲話希望另一半「溫柔體貼」，但當你真係做到「好溫柔好體貼」時，啲女人又未必buy，究竟係女人太「口是心非」定抑或「男人不壞女人不愛」才是真理呢？日本就有調查指出，點解太溫柔都是罪過︰

其實溫柔唔係唔好，但大部分溫柔嘅男士都會有類似嘅特性，比如個人比較悶、比較木訥，同佢一齊過於安心平淡，少咗份戀愛嘅激情，冇咗一種會令人心兒卜卜跳嘅緊張刺激。

另外大部分溫柔男士因為慣性太遷就別人，所以自己好少表達意見，咩都會以他人為先，比如食飯去邊？就會話︰「你諗下想食咩？」、「你決定丫，我都可以」，就算條女呢頭話想食西餐，轉頭又想食日本嘢，溫柔男都唔會介意，笑笑口咁話︰「無所謂呀，你話事得喇。」係就係好就得人，但可惜太冇主見，女仔係好難會buy……

話說結衣BB做主角嘅《逃避雖可恥但有用》一劇中，男主角平匡都係一個非常溫柔嘅男士，而好多女性都認為，太溫柔嘅男士同時會非常被動，就好似劇集中，溫柔嘅平匡每每想主動出擊時，都率先顧慮女主角實栗嘅感受，搞到次次都要實栗自己主動返轉頭，帶動個男人。除非個女仔天生母愛爆棚，如果唔係應該好難接受咁被動嘅男人。

再引用返套劇，溫柔嘅男主角成日默默思考好多事情，想為女主角做到萬事周到，但呢一切佢都只會喺腦入面盤算，唔會講出口，令實栗成日唔知對方諗咩，唔知對方想點，繼而產生好多不安情緒同相處間引起誤會。

話就話太溫柔都可能變成缺點，但假如呢個特點係你嘅本性，千祈唔好放棄，溫柔都有溫柔嘅魅力，總會有識得欣賞你嘅人出現。