一分鐘即可入睡 478呼吸大法

文：MenClub Mean娜　　圖：互聯網
POSTED ON 19 Jan 2018

香港人生活壓力大，夜晚失眠或者瞓得唔好已經係家常便飯，如果你都會成日失眠，又試過晒瞓前沖熱水涼、飲熱牛奶等等方法，不如試試美國哈佛大學醫學博士Andrew Weil教嘅「478呼吸大法」，據講一分鐘就可以助你入睡。

所謂「478呼吸大法」，就係要你先將舌尖抵住上顎，用嘴呼出所有氣，然後用鼻慢慢吸氣4秒，再閉氣7秒，最後慢慢用嘴呼氣8秒，只要咁樣連續做四次，就會開始有睡意。當你用鼻吸氣4秒時，可以吸入更多氧氣，閉氣7秒時，可以令氧氣更徹底進入血液，到用嘴呼氣8秒，就可以減慢心跳，令肺部排出更多二氧化碳。由於壓力會導致呼吸短淺，所以練習深長嘅呼吸可以有效對抗壓力同焦慮，降低交感神經運作，令你個人更加放鬆。佢強調只要經常反覆練習，就會奏效。但留意呢個呼吸練習唔可以執著於時間，咁做反而會產生壓力，令你更難以入睡。