日本人嘅創作力量同幻想總會嚇你一跳！就算佢哋嘅發明唔係全部實用都好，但單單睇佢哋嘅念頭同創意，已經足夠令人拍案叫絕大讚欣賞！就好似來自日本多摩美術大學嘅網友よしだ（@five1996）咁，佢就發明咗一個Q得嚟又冇咩用嘅「腳趾尾頭盔」，被網民喺網上瘋傳，皆因大家都知道，就算戴咗「腳趾尾頭盔」，撞到尾趾都一樣咁痛，但偏偏呢個idea，又真係好鬼可愛。

相信唔少巴打都試過撞到腳趾尾，嗰種痛真係入心入肺，於是網友よしだ就決定發明一個腳趾尾專用嘅迷你頭盔，好好保護腳趾尾！雖然實際上冇可能真係戴住呢個「腳趾尾頭盔」四圍走，但單單呢個概念都咪話唔新奇有趣，值得加分，可能第時有人就會因應呢個概念，設計出真係用得著嘅腳趾尾保護器都未定呢～