一路以嚟大家對WASABI嘅印象都係一坺綠色嘅泥咁，但最近日本Twitter就有個新款WASABI跑出，成為Twitter嘅話題食品，佢就係芥末加工品田丸屋嘅「わさわさビーズ」！

創業140年嘅日本芥末商品老店田丸屋趕上影相呃Like潮流，將平凡嘅WASABI變成好似水晶咁晶瑩剔透嘅「わさわさビーズ」，就咁睇十足綠色嘅魚子一樣，用嚟影相確係唔錯！

田丸屋就表示，呢種「わさわさビーズ」係用上靜岡產嘅WASABI，再包入海藻製成嘅啫喱狀皮膜，做成無論外觀同口感都接近魚子嘅「わさわさビーズ」，望落好靚但咬破就會有WASABI嘅嗆辣味！雖然「わさわさビーズ」嘅碧綠色靚得好夢幻好唔真實，不過田丸屋就強調呢隻綠全來自天然WASABI嘅綠色，冇使用任何色素，大家可以放心食用。

不過其實樣都係其次，唔少人都比較期待咬爆佢滲出WASABI味時會有幾High就真，如果巴打見到呢款「わさわさビーズ」，又會唔會買嚟試呢？