日本有好多古靈精怪嘅專門店，而最近有一間專門店喺網上引起話題，唔少人都特登慕名而去，佢就係「抆白頭髮專門店」！

好多人都會介意自己嘅白頭髮，有啲人會選擇染黑佢，有啲人就會選擇抆晒佢。而日本呢間「抆白頭髮專門店」（白髪抜き本舗）就係一間專幫人抆白頭髮嘅鋪頭。呢間「抆白頭髮專門店」收費大約係半小時3980日幣，大概10分鐘就可以抆走你30—70條白頭髮，等你可以坐喺度安心解決白頭髮煩惱，唔使自己一條條抆咁辛苦。

而店內嘅裝潢都相當時髦，一啲都唔老氣，畀人一種舒服嘅感覺，就算坐成個鐘畀人抆白頭髮都唔會感覺侷促。

雖然呢間「抆白頭髮專門店」好似好古怪，但又真係有唔少人特登上門去幫襯，之不過其實咁多白頭髮嘅話，染咗佢唔會比抆晒佢更好咩？起碼唔會令你變到好少頭髮嘛......