大多數老一輩都認為結婚一定要大排筵席大費周章先稱得上「得體」，「擺酒」當然係絕對唔少得嘅一環！雖然話結婚係人生大事，但今時今日，香港好多年輕人都寧願齋簽字，唔擺酒，原來唔係得香港後生仔係咁，就連日本年輕人都有類似想法，認為與其搞場大龍鳳去搞婚禮，不如用呢筆錢去旅行或者養細路仲實際！

日本網路電視AbemaTV早前製作咗一個關於年輕人越嚟越唔想搞婚禮嘅專題報導。

據節目分析，喺日本搞婚禮，平均總額係354萬日圓，即係約港幣24萬左右；而喺婚禮中需要招待嘅客人人數平均約70人，所以唔少日本後生仔都認為搞婚禮又花錢又麻煩。另外喺日本辦婚禮仲有唔少令年輕人感到煩厭嘅規則，比如回禮、服裝要嚴格遵守規定、婚禮途中要不斷換衫等等，單係諗下都覺得煩，更何況要一一實行呢？而且聽過唔少香港「過來人」經驗，討論婚禮內容期間，就算唔係同另一半鬧交，好多時候都會同對方家庭成員引發爭拗，例如禮金要幾多、請邊啲親朋好友、長輩嘅裝扮等……雖然話結婚係兩個人嘅事，但終歸會牽涉兩家家庭成員，人多意見亂，因為婚禮而同另一半家人搞到關係不和嘅例子絕對多的是！

不過即使辦婚禮禮節繁複，最令日本年輕人卻步嘅始終係金錢問題。節目播出後，好多日本網友都反映，唔想辦婚禮主要原因都係因為「唔想用咁多錢」或根本「冇錢可以用」！睇嚟大家都認為搞婚禮過於奢侈而且唔實際，將啲錢儲起作其他用途更為恰當。