由細到大都聽人話「男子漢流血不流淚」，但如果你知道喊都可以幫助減肥嘅話，呢個夏天你又會唔會覺得自己係可以大條道理流下男兒淚先？

話說一項最新研究指出，其實喊係可以幫助減肥，喺你喊嘅時候，身體會消耗卡路里並抑制飲食慾望，從而有助減肥。雖然傳統社會會認為男人唔應該咁易流淚，但就好似電影《Inside out》咁講，有時候我哋都要容許自己釋放負面情緒，喊會幫我哋同時釋放賀爾蒙並且調整皮質醇水準，宣洩情緒嘅時候都會將體內毒素排除，喺生理同心理上都有好大幫助。

而壓力專家博士Pete Sulack亦表示，喊嘅時候眼淚中嘅壓力荷爾蒙釋放出嚟，就可以降低皮質醇，皮質醇減少會令身體冇咁易儲存脂肪，同時亦會降低對食物嘅慾望，間接減少熱量攝取。

但唔好以為所有眼淚都可以幫助減肥，原來眼淚都分三種，一種係用於潤滑眼球嘅基礎性眼淚，另一種係用嚟保護眼睛不受刺激嘅反射性眼淚，最後就係傷心時嘅情感眼淚，其中情感眼淚包含20-25%蛋白質同多種賀爾蒙，所以要減肥就要用流到情感眼淚先有用。

不過呢期香港咁多傷心事發生，要大家為香港流下情感眼淚，都應該唔難……