每逢夏天日本都會狂推「薄荷朱古力」口味嘅食物，無論係糖、雪糕、朱古力，甚至乎係麵包都會推出「薄荷朱古力」口味。有網民就忽發奇想，惡搞品客薯片，自製出「薄荷朱古力」新口味，單係個樣就已經非常衝擊！如果品客真係出呢隻口味，巴打你哋又會唔會試？

傳說中呢款「薄荷朱古力」品客薯片喺網上流傳，開頭有唔少人質疑真偽，以為品客堅推出呢隻咁特別嘅新口味，不過只要細心睇真啲，薯片叔叔個樣同品客（Pringles）個字都同正版唔同，好明顯係惡搞，不過認真程度絕對有10粒星星！

呢隻惡搞「薄荷朱古力」品客薯片卡路里仲有成999，睇見都嚇親唔少人，不過咁都仲未係最可怕！最得人驚係「薄荷朱古力」薯片本尊，每一塊都好似中咗毒咁，咁詭異嘅顏色同味道，有冇勇者可以試試佢先？！