日本人創意無極限，單單係文具都千奇百趣，最近仲新出咗一款「富士山擦膠」，唔好以為佢係一般造型擦膠咁簡單，其實佢內有乾坤，你唔用呢舊擦膠嘅話，佢就一直都只會係平平無奇嘅文具，但只要你勤力使用，呢舊「富士山擦膠」就會愈用愈見真章，用用下就會變成一座美麗嘅富士山，相當有意思！

由日本PLUS推出嘅「富士山擦膠」一開頭外型同普通擦膠無異，只係配色上唔同，佢嘅特別之處在於擦膠中間特別留白，但千祈唔好睇少呢個白色部分，一舊擦膠就係靠呢少少白色變成富士山！

「富士山擦膠」嘅賣點係當你用得佢愈多，佢就會愈磨愈尖，慢慢變成一座山嘅形狀，而中間白色部分，配上藍色嘅擦膠，睇落就十足一座富士山！

「富士山擦膠」一共有藍同紅兩種配色，搭配傳統花紋嘅包裝，一共有10款可選擇。目前「富士山擦膠」預計於7月10日喺日本全國文具店、大型零售店、專賣店、網絡平台等處販售，售價200日元，用嚟買畀小朋友做手信都係唔錯嘅選擇！