雖然人人都知放屁係自然嘅生理現象，但真係畀人聽到同聞到督屁嗰下，又確實係會尷尬到想搵窿捐！所以呢個世界上先會出現各種各樣嘅滅屁產品！所講滅屁，又唔係真係可以令你唔再放屁，只係令你督屁唔再臭咁啫！例如早前MenClub介紹嘅「過濾屁護墊」，就係其中一樣令你可以安心放屁嘅產品，據講呢個「過濾屁護墊」，只要貼一塊係底褲度，放屁時通過護墊裡面嘅活性炭成份，就可以淨化氣體，達到除臭效果。

不過老老實實，屁嚟講呢，單係消除臭味係唔夠架！計我話，最重要嘅Function係滅聲就真！如果係無聲臭屁，淨係聞到陣味，你話邊個放都得啦，到時求其捏住個鼻屈個肥仔放臭屁，話咁易就可以保住自己嘅形象！但聲呢家嘢就唔同，一「呠」出嚟大家都好易察覺係由邊個方位傳出，唔似味道咁咁易飄散於空氣之中，要屈人就難好多喇！所以話呢，對付屁嘅Product而言，唔只要消味，仲要消音先真正幫到人！

雖然市面上暫時得消除屁味嘅產品，但希望在明天！東京學藝大學附屬高校三年級嘅布施和伸、斎藤和寛同埋齋藤潤一，就研發出特製底褲，可以去除放屁時嘅氣味同聲音！

呢款「無聲無味放屁底褲」裡面放咗一包活性碳、兩塊不鏽鋼板同埋兩層吸音海棉，只要著上呢個「無聲無味放屁底褲」放屁，距離屁股30cm以上，就唔會有任何臭屁味！而佢哋亦用上分貝儀測試呢條內褲嘅消音程度，雖然未達至完全冇放屁聲嘅目標，但比起著住普通底褲時放屁，聲音明顯細咗好多！咁起碼督屁細聲咗，都難啲畀人知係由邊個人嘅方向放出嚟丫！

而三位高中生表示，佢哋會繼續研究「無聲無味放屁底褲」，希望可以加倍著重於滅聲功能上，真正幫到有屁唔敢放嘅人！亦希望成功後可以將呢款底褲商品化販售，期待呢個「無聲無味放屁底褲」快啲面世呀！