日本人呢期玩珍珠玩到爛，又「珍珠奶茶飯」又「珍珠奶茶奄列」又「珍珠奶茶沾麵」咁，估唔到玩到呢一刻都未玩完，而家又話出「珍珠拉麵」，喺拉麵度加珍珠都算，最離譜係咩呀？堂堂拉麵要畀你當奶茶咁裝入杯度仲要畀埋飲管你去啜啲麵呀！有冇考慮過拉麵嘅感受？有冇考慮過鍾意食拉麵嘅顧客感受呀？？

話說最近東京AQUA CiTY台場5樓「拉麵國技館　舞」裡面，由7月1日至9月1日舉辦嘅「夏イケ麺祭」當中，拉麵店「二代目 博多 だるま」就推出獨特嘅期間限定菜單——「タピオカ『令』麺」（珍珠「令」麵），佢係將珍珠加入夏天食嘅冷拉麵裡面，再配合新年號「令和」而取名而成嘅新料理「珍珠令麵」。以鰹魚高湯為基底，再放入細麵、糖心蛋等等配料，除咗珍珠之外，基本上同普通冷拉麵冇咩分別……不過比起珍珠更令人震驚嘅係，呢款「タピオカ『令』麺」係用杯裝，再配上飲管畀客人慢慢啜……

如果咁樣食拉麵都唔哽死，真係算佢好命……