喺睇呢篇文之前，我想大家回想一下煲一煲飯嘅過程…OK？諗到啦嘛？係囉，喺香港甚至整個亞洲，只要你唔係飯來張口衣來伸手嘅死o靚仔，你都一定知道點樣煲出一煲飯來，但對外國人黎講啦喎，煲飯就唔係咁容易。例如馬來西亞棟篤笑表演者Nigel Ng就喺自己嘅Youtube Channel中，以「Uncle Roger」嘅身份睇咗一條BBC Food教人整炒飯嘅片，片中教人煲飯嘅過程就睇到佢眼火爆，佢條片更成為網上熱話！

實際上條片有幾好笑，大家自己慢慢睇。我就淨係同大家講下BBC Food條片入面煲嗰煲飯有幾咁錯。首先，片中嘅女士係冇洗米就即接開始煲；其次，佢教人煲飯，米同水嘅比例係1:2，但大家記得細個阿媽點教嗎？係米上面有一節手指嘅水就OK架啦嘛！第三，佢煲完煲飯都仲係水汪汪，話佢係潮州粥都嫌佢稀，而且由於水太多，佢竟然拎個筲萁隔返啲飯出黎。都唔緊要，最後佢仲拎啲飯去用生水沖…難怪睇到呀Uncle Roger咁嬲！加上呀Uncle Roger又鬧得好好笑，結果條片呢兩日爆紅，目前已經超越200萬人觀看！