日本Monya 繼早前嘅「一酸化二水素」 (即係一氧化二氫，即係水) 水樽之後，又推出兩款充滿惡趣味嘅小物。今次以Windows用家嘅惡夢——Hang機問題為主題！真係睇到都覺得炆憎呀！

第一款係模仿Windows Hang機，「程式已經停止連作」嘅畫面而設嘅膠File (500Yen個)，特別「有心」嘅係採用半透明設計，將啲文件放咗入去之後，真係非常似一個Hang機畫面，明知佢係假嘅都有啲燥燥地。

另一件產品就係啤牌，不過唔係普通啤牌，而係將牌面換成Windows 401-413錯誤訊息嘅啤牌 (2000Yen 一副)，隻Joker仲要係傳說中嘅藍畫面。由於啲錯誤訊息實在太搶眼，我望咗足足有五分鐘先發現原來有寫花色及數字。試想像下用呢副牌黎鋤大Dee，然後一檯都係錯誤訊息…好大壓力囉！