踏入三月，除咗望住月尾個復活節假，各位又係時候為夏天做好準備，做下運動減走儲黎過冬嘅脂肪。你需知道家陣做運動唔係為咗健康咁簡單，而係一個非常複雜，要經過仔細計算嘅公關工作。所以你有冇減到肥、有冇真係做過運動、甚至有冇踏入過GYM房都唔係重點；重點係你說服到人你去過就得啦！所以，只要你學識咗以下呢九招，唔單止可以滿足自己「去做GYM」嘅願望，仲可以順手建設埋陽光健康型像，一箭雙鵰得黎仲一滴汗都唔使流。

我就諗住由今個禮拜起實行，你都唔好執輸啦！

1. 由朝到晚著運動衫

所謂人靠衣裝，就算你同平時一樣，一日之中最大運動量就係右手打完字再伸去拎返隻Mouse嗰下，只要你著住成套運動衫，個Feel就即刻唔同哂。所以由朝到晚甚至瞓覺都著住套運動衫，就會連自己都呃埋：「其實我都係Sporty呀？」萬一你真係咁睇唔開諗住去做啲真正嘅運動，起碼你唔使換衫先囉！

2. 運動前飲酒

飲醉之後連Send MSG比一個你曾經發誓以後都唔會再同佢聯絡嘅EX話：「我仲好掛住你！」呢啲咁樣衰嘅嘢都做得出，去GYM房做下運動又有幾難？而且做GYM前飲酒仲有以下好處：

1. 你終於可以放膽大聲笑嗰啲一日到黑淨係望住塊鏡自摸嘅所謂「健身人士」

2. 終於夠膽大聲反_啲係咁Sell你健身計劃嘅Sales

3. 你會出乎自己意料之外地做好耐GYM(大部份時間係因為你喺更衣室肿著咗)

3. 「意外地」唔記得帶重要道具

大家都有試過，去做GYM要帶運動衫、做完運動要換嘅底衫褲、抹身毛巾、抹汗毛巾、水樽、耳筒、放部電話嘅運動手帶、解悶嘅iPad等等等等，當中係缺一不可嘅。所以若然你好唔小心咁唔記得咗帶其中一樣，就唯好無奈地、不情願地打道回府－－記係喺入去之前打定卡，同做咗GYM係冇分別架！

4. 良好地分配時間

先花十分鐘做輕巧嘅拉筋、伸展活動，再用五十分鐘係桑拿房焗出一身汗－－重點係千祁千祁唔好抹走佢。保持一個「出水芙蓉」樣，再加上全身㷫烚烚嘅完美，你就會相信自己好努力咁燃燒咗好多脂肪！

5. 等機用

揀一部有人用緊嘅機，企喺側邊等三分鐘，問下佢仲會用幾耐，然後無論佢答啲咩，轉身等過第二部有人用緊嘅機。如果佢即刻起身讓比你，不慌不忙地坐低，用五分鐘較好個Sit位，然後起身等過第二部。

6. 記緊補充水份

大家都知如果做運動時唔適當補充水份，就會好易中暑暈低。所以你應該自備水樽去GYM房斟水，又甚至將斟水當成你做GYM嘅項目之一，咁就一定唔會缺水啦！

7. 移動啞鈴

根據自己的能力，拎起啞鈴；放低，做啲仲展熱身動作；拎起啞鈴，放回原處。冇人會知你根本咩冇做過！

8. 做筆記

買一隻擁有複雜計時功能的電子錶，每隔五分鐘就用手按住自己頸側，望住隻錶發呆一分鐘，好似你有嘢數緊咁。然後拎出一本事先準備好嘅筆記簿，玩一鋪數獨。轉個位置重複動作。

9. 黑超與濕毛巾

戴上黑超所以冇人會知你究竟係咪瞓著咗；一條少少濕嘅毛巾令你睇黎好似出咗好多汗，成個畫面就變咗你好努力咁做完GYM休息緊。

10. 退場姿勢

老實講，你喺GYM房入面做咗啲咩其實唔係重點，因為你嘅目標觀眾通常都唔喺個GYM房入面。所以你用咩樣喺行出黎就變得非常重要！上一招教落嘅黑超同濕毛巾可以Keep住，另外記住倒半樽水落自己個頭到。一來可以令你睇黎出咗好多汗，二黎啲人見你個水樽得返半樽水就會以為你真係有做運動。最後，記係要買一個有咁大得咁大嘅運動袋。