大家仲記唔記得有段時間，市面上多本時裝潮流雜誌都會有個「專家教你分假貨」嘅SECTION，每個星期搵黎專家同你講解假貨同真貨嘅大不同？初初對於消費者黎講就當然非常有用，但後來隨住大國掘起，「外國」廠家手藝越黎越好，加上「沒有假貨」嘅淘X，啲咩咩「高仿」、「超仿」就好似自由行咁日日湧入黎，要分咩係假貨咩係真係就唔係咁容易。於是近年嘅「專家教你分假貨」就變成「找錯處」，與其話個所謂「專家」真係識分真假，睇落更似係佢知道邊對真、邊對假之後再同你慢慢找不同，根本就冇說服力可言！

外國購物網站Hypebeast就深明「專家」最叻「扮專家」嘅道理，於是搵黎多對真真假假嘅大熱波鞋，等幾位「專家」即場鑑證。當中就包括依家仲COMMON過白飯魚嘅Air Jordan 11 Retro Legend Blue同Stan Smith等。想知結果係點？即係咁，如果佢哋真係估中哂，我都唔會寫呢篇嘢啦！

不過講開又講，早幾個禮拜文青諗住買返對新鞋過年。明明已經係去馬X松之類嘅連鎖店睇，但啲波鞋嘅質素都好似係淘寶貨咁－－即係七、八舊水買對波鞋，啲膠水仲上得衰過我砌高達，我就真係接受唔到囉！