喺香港地想上車，一係要有個做護士嘅女友，一係要有老豆借六百萬比你。如果唔係，就連TVB當家花旦小生楊怡同羅仲謙都要乖乖地排隊買將軍澳「緻藍天」－－人哋做緊主角又《衝線》又盛喎，都同你班普通市民大熱天時排隊買樓，都唔知話係你哋太富貴定佢哋太閉翳好啦！

既然連小生花旦都覺得買樓有難度，你又唔怪得啲媒體日日都同你報導啲上車勵志故事，人哋無非都係想鼓勵你哋追尋人生的意義啫！就好似以下呢個關於美職棒選手Daniel Norris嘅「上車」故事，都好發人深省架！

呢位目前效力美職棒多倫多藍鳥(Toronto Blue Jays)嘅21歲投手，淨係新合約嘅簽字費就已經有200萬美元(約1550萬港元)。咁又唔係咩天文數字，但都夠你買兩個「緻藍天」單位咁囉。咁你話呢個上車故事有咩咁吸引？就係因為佢上咗部真嘅車嘛！

呢架貨VAN唔係有咩特別設備，唔識變大縮小，入面嘅空間就連差啲啲六尺(嗯…差半尺到咁囉…)嘅文青都覺得窄，但偏偏六尺二高嘅Daniel每年都會揸住呢部被佢名為「Shaggy」嘅1978年VW貨VAN，到加州參加球隊嘅冬季訓練。佢話住喺呢架車入面，可以忘記自己平時係一個愛萬眾注目嘅職業棒球選手，過一啲自己又獨立嘅生活；而呢種奇特嘅生活方式亦可以避免球場上嘅名利改變佢嘅初衷

當被問到係咪想透過咁樣嘅生活方式改變某些事，Daniel的回答是：「我不覺得自己在改變任何事。我只是在創造自己的人生故事並享受其中而已。」