作為男人又有揸車嘅你，應該有遇到過以下呢個情況：你揸車載住你老婆/女友/阿媽/阿爸/朋友，沿路已經畀前面架車頂到你慶烚烚，偏偏隔離位條友一路就用口揸車，又叫你抽頭又叫你走線，又話你油門控制唔好又話你唔睇路，最大問題係條友連車牌都冇！喺呢個時候，你係咪好想一腳就伸佢落車一了百了呢？

但一個有理智嘅Gentlemen係唔會咁做嘅－－因為要咁樣伸佢落車，咪連度車門都伸爆埋？咁樣絕對係得不償失呀！所以，你就好應該期待以下呢架概念車會正式投產，因為咁樣你就可以成架車伸_走佢！

呢個唔係魔術，所以唔使「典解嘅～～」住！呢架「Landsplitter」係由美國設計公司「Argodeisgn」設計，表面上係一架兩座位四輪車，但其實可以隨時分開為兩架電單車。設計用上無心車輪，除咗令外型更加有科技感，亦都改變咗整個轉向系統嘅運作，從而放寬對車身返計嘅限制。

在分開嘅情況下，前輪會稍為分開以提升平衡力，相反在合體狀態下就會收起。組合方面就用全自動組合，但就唔知可唔可以於行走中合/分體。