日本咸書研究報告(3) - 特質資訊系

文：MenClub 魏文青　　
POSTED ON 14 Jun 2015

日本咸書研究報告系列黎到第三集，繼說你去買AV嘅「AV導讀系」、以及買碟送書嘅「自給自J系」之外，今次就介紹本身「J點」甚低，但就提供大量有用資訊嘅「特質資訊系」！

3. 特質資訊系 - SOD同名雜誌《SOD》日本AV界兩大巨頭，Soft On Demand(SOD)無疑比起各自為政嘅CA集團(前稱北都)有更高整合性。直接嘅結果就係SOD喺市場推廣上比起CA要快好幾拍。例如SOD由幾年前就已經開始出版一本集AV界大小資訊、專訪、寫真、趣聞乜乜七七於一身嘅同名雜誌「Soft On Demand」。你可能同我一樣，第一眼見到呢本嘢就會諗起香港嘅「大台週刊」，以為說穿了其實就係一本省靚自己招牌兼自我安慰嘅「飛機雜誌」。但只要你睇清楚個封面，就會發現其實香港某大台，比起日本一個AV片商仲小家！

何出此言？因為個封面女郎，竟然係CA集團旗下E-Body嘅新人鈴木真夕！情況就即係大台雜誌封面係陳啟泰、東方太陽幫泛民抬轎、又或者Mandy Lieu去賀恭喜洗米華個老婆個女滿月咁－－又唔係話一定冇可能，不過成件事就好可疑咁囉！不過其實可能文青以小人之心度君子之腹啫。作為市面上唯一一本同類刊物，呢本SOD對整個AV界黎其實好有代表性。同時包括埋兩邊陣營嘅資訊，其實有助提高本書嘅公信力。好似今期嘅專題之一嘅「AV業界勢力圖」，就好大方咁包括埋Alice Japen、Premium、Maxing、E-Body等等CA系片商，甚乎Million、HMP等等第三方勢力。甚至喺書嘅最後，仲有幾頁係專登介紹SOD系以外嘅AV，真係稱佢哋做「AV良心」都不為過呀！

不過呢，縱然呢本嘢貌似好中立，但話哂大大隻字寫住「SOD」，擺到明係親生仔，唔宣傳下自己講唔通嘅！所以除以上所講之外，絕大部份嘅內容都係以SOD系為主。好似封面過後就係SOD一姐紗倉まな、人氣女優白石媽媽二連擊。而「勢力圖」之後，又要補返個淨係包括SOD系嘅比較表。至於例牌要有嘅AV介紹，就當然係SOD嘅天下啦！就連上面有介紹過、介紹其他片商作品嘅部份，個名都係要叫「SODファンに贈る他メーカーAVガイド(送給SOD粉絲的其他AV片商介紹)」，仲要話係因為欣賞人哋企劃而褒獎人哋，陣飛機味大到呢～～～！

除此之外，書入面都會有女優專訪(今期訪問人氣單體女優蓮實クレア)、讀者去信拎獎品(大多數為簽名板and/or 底褲，仲有真空包裝添)、女優的話(截取自SOD專屬女優嘅部落格)、寫真(神之池嘅涼川絢音)以及煮嘢食(都係絢音BB)添！

3. 特質資訊系 - 日本141《Man-Zoku》 Man-Zoku，即「まんぞく」也，中文即係「滿足」。咁你話一個男人喺「性」呢方面點先會滿足？答案就緊係同個真人女仔轟轟烈烈地戰鬥三百回合、至死方休！所以呢本書唔係介紹AV、即冇送AV、甚至同AV完全冇關－－因為佢介紹嘅係日本嘅風俗情報！

簡單啲黎講，呢本嘢就係實體版嘅日本141，其存在目的只有一個，就係介紹唔同風俗店嘅風俗孃，再引誘你去幫襯。而佢好體驗到日本人做事嘅專注，所以除咗風俗情報之外佢就幾乎乜都冇。就算係封面故事都係搵個風俗孃黎影幾張相、問幾個簡單問題。就算係好似好有趣嘅專題「春から始めるデリヘル遊び(無責任翻譯：春天開始與Deli-heal出遊。Deli-Heal為Delivery Healthy的縮寫，即為應召女郎)」其尺度比起o靚模寫真集都仲少嘢睇。嚴格上成本雜誌，大概只有兩頁係需要打格，其他嘅只能夠以「人畜無害」黎形容。

但又唔代表當中冇嘢學嘅。例如因為文青買返黎呢本係首都圈版本，所以介紹嘅都係東京附近嘅風月場所。其中一個不停反覆出現嘅地名就係「吉原(よしわら，Yoshiwara)」。有睇過《銀魂》嘅可能都知「吉原」係江戶時代所建立嘅煙花之地，玩位於東京都台東區。幾百年黎經過遷戶、多次大火、空襲、地震，以至日本政府對於賣淫法例嘅修改、限制，但到依家都仲係日本最大嘅風俗店集中地。同時，自2006年日本修定《風俗營業法》禁止街頭拉客，換言之除非係「色」途老馬，否則要摸熟呢個「第一花柳街」都唔知要花幾多精力時間同金錢。所以就有需要出一本書黎宣傳啦。

或者睇憤AV嘅我哋會對日本風俗界產生好多不必要嘅幻想，但事實永遠都係咁殘酷。第一，視力正常嘅Gentlemen應該都會留意到入面所介紹嘅女仔，十個有九個半都唔能稱之為「靚女」，如果用會考嘅「九品中正制」，文青認為個水準普遍只係去到「上下、」「中下」，就算水準高啲嘅都只係去到「中中」「中上」。雖然又未去到要幪頭入閘，但又未去到令人睇相就好「雞動」囉。

另外，日本嘅風俗業通常都頗為排外，某啲風俗孃更加係唔做外國人生意。就算做，根據法例，理論上都係禁止「本番(即係真正插入)」。當然，實際上「本番」嘅服務絕對會有，不過就要入到房同個女仔禮貌地提出。而且有可能要加錢。另外，日本嘅風俗店其實可以細分為好多種。嚴格上連賣酒不賣身嘅「陪酒女」都屬於風俗業。所以文青上面講嘅風俗孃其實只係故事嘅一部份。其他就有機會再同大家研究。

總括黎講，呢兩本書同之前介紹嘅咸書相比，視覺衝撃會少得多，但相對地就會多咗好多實用資訊。 (待續)