呢個世代嘅男孩子心靈特別脆弱，冇計啦，面對一眾狼死港女，兵力已大減70%，死嘅死，傷嘅傷。就算你決心唔做兵，淨係上網丁一丁，都一樣會受傷害，10個港女9個假相，仲有一個仲執緊樣。乜鬼嘢「有圖有真相」，Bull Shit啦！Facebook同IG啲圖咪一樣美圖秀秀執返嚟，真相何在？！好啦，以為出到街見到真人，應該冇死，但原來化妝前化妝後又兩件事，即係點？咪就係點都死囉。That's why而家嘅男仔就好追求簡簡單單嘅女仔，感覺好Pure好True。

喂！你鍾意呢Type，有好嘢介紹過你！有個19歲大學生Yasmin Gasimova，非常崇尚自然，而且眼大大鼻高高咀細細，都係靚女一名。

一邊睇，Mean娜個腦就係咁浮起「Let it grow～Let it grow～」

好哋哋女仔人家，學咩人咁多腳毛！其實Yasmin Gasimova接受英國媒體專訪時就表示，佢10歲左右就注意到，自己嘅毛髮比其他女孩子濃密，為免尷尬，佢就成日去刮走毛毛，點知愈刮愈粗，仲生得愈來愈快，每日都要花好多時間處理毛髮。佢坦言咁嘅生活實在太攰！索性就學吓點樣同毛毛相處。

而家Yasmin Gasimova已經係英國利物浦大學嘅大學生，佢決定送一份禮物畀自己，就係將累積了8年嘅毛毛公諸於世！

佢登出自己毛髮橫行的樣子，並寫道︰「這是女性身體的真實面，不應該被隱藏起來！」

就算畀人話佢係「毛孩」，佢都唔覺得可怕，亦都願意喺朋友面前展現體毛。不過由於佢細個有鬍鬚而被同學嘲笑，所以更Free都好，佢都會每日處理鬍子。

不過Yasmin Gasimova都會考慮其他人嘅心情。佢話，如果要去海灘、去游水又或者要玩一夜情的話，佢都會考慮刮體毛，畢竟自己唔在乎，唔等於其他人都唔在乎。

雖然仲有好多朋友會勸Yasmin Gasimova處理體毛，但佢就認為︰「世人對待女性嘅態度唔應該比男性嚴苛」。

講得好丫！你睇佢幾錫佢啲毛～！