一直講關於自己嘅事情
有時同朋友傾偈，例如討論緊自已最近嘅戀愛，對方就會開始話︰「我都試過呀！之前我……」跟住就會一直講自己點點點點點，其實人哋同你討論緊自己嘅事情，真係唔會特別想知關於你嘅事，可唔可以唔好下下都將話題拉到自己，聽吓人講嘢先！

一直抱怨
其實我知你唔開心想搵人傾下，但你傾嘅內容只有一味抱怨，話呢樣唔好，嗰樣唔好，對方除了可以講︰「係囉係囉。」咁附和你之外，其實成個對話基本上都冇嘢好傾，得你自己喺度講嘢，冇人地講。


不停打斷對方說詬
講講吓嘢畀人打斷，其實真係好不爽，而且仲會令人覺得好冇禮貌！呢個情況就好似唱唱下K畀人Cut咗隻歌再插歌咁！！諗起都嬲嬲豬！

說話內容總係好負面
每次傾偈都係傾啲唔開心嘅嘢，氹極你都仲係好負面，咁樣朋友都唔想理你啦！邊有人唔想開開心心咁傾偈，下下都要聽啲負面嘢，將啲唔好嘅情緒過埋畀朋友，咁人哋邊會想理你。

成日否定別人嘅說話
唔係話人哋講咩都一味要附和，但無論講咩都否定對方的話，對方都會覺得同你傾偈好無癮，嘗試用其他方式表達你嘅意見，唔好下下用「不過……」、「但係……」，可以試下話︰「如果……」黎提出其他建議。