日本的陰暗面「販賣高中少女」

文：MenClub 魏文青　　
POSTED ON 25 Jul 2015

有人話日本係一個女子高校生（JK)嘅國度。因為喺呢到，動畫漫畫遊戲嘅主角係JK、偶象明星寫真女優又係JK、產品代言街邊招徠嘅都係JK，你甚至可以直接買起佢哋本人－－就算唔計你個腦依家諗緊嘅「服務」，日本亦有Cafe嘅賣點係有JK駐場同你傾計。

作為男人，你同我可能都覺得呢種文化冇咩問題；但如果你設身處地喺女仔嘅角度諗，一班男人、一班好有可能對你有各種幻想嘅男人，花錢買你嘅時間、甚至意圖買你嘅身體，就算唔能夠斷言為錯，起碼都唔應該咁公開。但偏偏日本嘅大街小巷都充滿類似嘅服務。Vice News就為探討呢種「販賣JK」嘅現象，而拍咗以下呢段17分鐘嘅紀錄片。

日本街頭充斥很多女子高校生作人肉招牌，但通通都唔可以影相上鏡。甚至會有「管理人員」出面干涉。

根據旅居日本超過20年嘅美國記者Jake Adelstein，所謂JK文化係源自於九十年代嘅「援助交際(對，援交）」。而大部份嘅顧客只係因為覺得孤獨而希望尋找心靈上的慰藉，並非為咗上床。但當JK文化與賣淫之間界線越黎越模糊，工作在內嘅女子高校生處境亦會越黎越危險。 Jake更指JK文化牽涉到日本根深柢固嘅男女地位問題。喺女性工作嘅機會本身就較少，加上長期被社會壓迫，以致對於自我身份認同低下，認為自己只能夠成為一種「商品」

其中一位接受訪問嘅前「JK從業者」指自己由16歲開始「JK散步」，當時佢媽媽精神出現狀況，導致家庭不和睦，佢自覺唔屬於任何一個地方，於是以喺秋葉原派傳單嘅工作逃避。初時佢以為呢個會喺輕鬆嘅工作，但後來發現當中有好多「潛規則」，而且一切都只係在於對方嘅出價問題。

而根據每晚都會於東京街頭「拯救JK」嘅志工Yumeno Nito，理論上是受害者嘅JK更會被當成始作俑者。日本政府回應問題嘅方法係試圖檢控從事「JK散步」嘅女仔，但所謂一隻手掌拍唔響，只要(男人的)需求仍在，供應依然會繼續。

片尾亦有特別提到，以年輕女子作招徠並唔係日本獨有，例如美國本身都出過Britney Spears、Selena Gomez、Ariana Grande等等喺未成年時都作過性感打扮，理論上一樣是在消費少女。但日本嘅問題之所以與別不同，係因為一切都發生於社會嘅表面。而當被問到西方國家批評日本嘅「JK文化」，會否被說成是將自己嘅文化蛋加於別人身上，Jake就指出日本作為「世界人權宣言」簽署國之一，理應要制止「人口販賣」發生。