你有冇諗過自己有一日要喺廁所開飯？除非你有不可告人嘅食癖，如果唔係都幾難有呢個機會。但如果你第時生咗個仔，又諗住以母乳喂哺嘅話，你個仔就好可能會淪落到要喺廁所開飯。

唔單止喺香港，其實喺世界各地，社會對於母親於公眾場合以母乳喂哺嬰兒嘅接受性都唔高，但同時亦缺乏配套(如在商場中設置哺乳室)方便媽媽們。結果媽媽們唯有匿入廁格、雜物房等地方餵哺嬰兒。而為咗推廣母乳哺育，「國際母乳哺育行動聯盟(WABA)」就將8月1~7日定為「國際哺乳週」。世界各地亦有不同嘅推廣活動，例如香港Unicef嘅facebook專頁就上載咗一條宣傳短片。