超好睇! 「ピタゴラ装置」的大冒險

文：MenClub 魏文青　　
POSTED ON 04 Nov 2015


唔知大家覺唔覺上面呢個圖案有啲熟口面呢？好幾年前文青曾經非常沉迷喺Youtube上面一啲叫做「ピタゴラ装置」嘅片。簡單啲黎講，就係一個(或者一堆)波波穿透一系列精心設計、類似骨牌嘅機關、又上又落咁去到目的地，而最後通常都會出現呢個Logo。當時文青冇特別為意佢有咩意思，到近日我先知道原來NHK教育頻道有個叫「ピタゴラスイッチ」嘅幼兒節目，每集都係介紹啲世界奇事、科普現象等等趣味知識。而每集中途就會有「ピタゴラ装置」登場。
真係百看不厭
而近期佢哋仲出咗個有劇情嘅版本！以下呢個名為「ビーすけの冒険」嘅特別版本來係夏季播出，講述「ビータ」、「ビーすけ」同「ビーゴロー」三兄弟本來一齊快快樂樂生活，但突然之間「ビータ(綠波)」同「ビーゴロー(黃波)」就畀人捉咗，於是「ビーすけ(紅波)」就要去救兩個兄弟！

呢條片傳下傳下竟然傳到去外國人氣討論區Reddit，嗰邊嘅網民都非常讚賞個劇情同當中嘅機關，於是傳下傳下又傳返去日本。所以話好嘢係一定有人識欣賞！

反正都係，唔啱我又問下大家記唔記得曾經有個日本節目，係搵班專家去參加者屋企，用佢啲傢私雜物砌一個篇佈全屋嘅「ピタゴラ装置」，目的就係幫佢煮早餐、餵狗之類？我想睇返好耐都係又唔記得咗個名……