只需300美金新加坡Blogger坐頭等環遊世界

文：MenClub 魏文青　　
POSTED ON 03 Nov 2015

旅行，大家應該都成日去；之但係坐頭等去旅行，應該就唔係個個有機會試；如果係講緊坐Emirate(車仔同阿仙奴心口嗰個)嘅頭等艙去旅行仲要係環遊世界，就更加係同粉紅色XX一樣係可遇不可求！之但係有個新加坡旅行Blogger近期就出咗篇文話畀大家知，粉紅色XX原來係週街都有架！

話說呢個名為Sam Huang嘅Blogger早排坐「Emirate」嘅頭等艙遊遍亞洲、歐洲、非洲、北美同大洋洲前前後後11個城市，成程理論上要使超過6萬銀美金！但佢最後只係用咗300美金(約2350港元)就搞掂。更重要嘅係佢坐嘅係「Emirate」呀，「阿聯酋」呀大哥！你都知杜拜啲警車都係Buggati Veyron架啦？佢哋對於「豪華」呢兩個字嘅演繹同我哋係有根本上嘅分別架！唔信你睇下Sam Huang放上網站條片？

OKOK，我知你哋入黎唔係想睇人哋個頭等有幾巴閉，係想知點先坐到頭等呀嘛！Sam都好大方咁公佈咗個方法－－答案就係用信用卡換飛行里數！話說「Emirate」同美國「Alaska Airline」乃係合作伙伴，兩間航空公司嘅飛行里數可以互換；而另一邊廂Alaska Airline又同Bank of America及Starwood Rewards發行嘅四張信用卡有合作，申請即送飛行里數。更重要嘅係當你使用其中一張由Bank of America發行嘅信用卡消費滿一定金額，佢又會再送飛行里數，而且只要等超過91日又可以重新申請。於是Sam申請哂四張卡(根據Traveller嘅報導係15張)再用佢哋黎消費，儲足成年先至儲夠飛行里數換機票。

故事未完！因為根據Sam指，現時大多數航空公司都唔會容許乘客喺一程機入面加入多個「Layover」地點－－所謂「Layover」即係途中停留不多於24小時嘅中途站。例如由香港飛英國，中途喺杜拜停一停，咁杜拜就係Layover－－但偏偏Alaska Airline嘅電腦就冇呢個限制，於是佢就可以喺一程新加坡去紐約嘅行程中加入悉尼、墨爾本、米蘭等多個中途站。

簡單啲黎講，Sam其實係用咗成年黎做資料搜集、申請信用卡同儲飛行里數，再加上航空公司嘅電腦系統漏洞，先換到呢個每個城市都留唔到24個鐘嘅「環遊世界」之旅。真係可遇不可求架！不過佢個網站貌似都有教人點樣儲飛行里數換其他機票，有興趣又不妒去睇下。
Topmiles