唔知各位巴打有冇試過，機緣巧合下結識了一位可人兒，發覺對方生得唔錯，人品又幾好，重點係同你都幾夾，兩個人相處得好舒服，感覺上應該好有發展空間。當你對佢漸漸有好感嘅時候，突然一個晴天霹靂，得知……「X！佢有男朋友嘅？！」

係呀！雖然香港男多女少，但唔知點解，好多男人都試過喜歡上一個有男友的囡囡，重點係剛剛識佢時都以為佢單身，後來先發覺佢名花有主，可惜自己已經中咗伏！唔想再有呢啲悲劇發生？得！最近網上有人分析單身囡囡有咩特徵，等你可以正確地搵出目標人物。

不過……Mean娜就覺得條友分析得麻麻囉……與其話係單身女嘅特徵，不如話係女漢子嘅特徵……Any肥，對媾女有用嘅知識，睇吓都冇壞，可能真係幫到你呢！一齊睇睇先！

打扮同長相都好平凡，講嘢唔會刻意扮嗲，更加唔會去討好他人
通常識得氹人歡喜，又有幾分姿色嘅女仔，都一早名花有主。如果對方各方面都普普通通，又咁我行我素，未必係男生嘅大眾情人類型，拍拖機會自然會細啲。

個性大情大性，毫不做作，想大笑就大笑，唔會遮遮掩掩
做作女通常都受男人歡迎，相反，有少少男仔頭又爽直嘅女仔，好多時都會被當係兄弟多過女人咁看待，單身機會比較大。

啲錢全部花喺吃喝玩樂方面，唔會點買衫或者化妝品去打扮自己
戀愛中嘅女人最美，最花心思打扮自己。如果佢都唔會刻意打扮自己，可能因為佢係單身，冇必要扮到靚一靚去討好男朋友，只要做自己就最舒服。

比一般女生仲要勇敢，就算打小強都完全冇問題
有男朋友嘅女生，都比較依賴，習慣咩都交畀男朋友，有得裝柔弱就盡量裝柔弱。相反，單身慣嘅女仔咩都要靠自己，粗重嘢又自己做，解決昆蟲又係自己做……

見到其他人曬恩愛，會感到好不屑翻白眼
凡係單身都會明，見到啲情侶咁痴纏地放閃，當然會想死。你話自己都有拖拍可以還以顏色就話啫。