日本人對底褲嘅熱愛程度真係無人能及，各式各樣底褲造型嘅產品經已見怪不怪，例如早前MenClub都介紹過嘅底褲水樽套、底褲橡筋等等，仲有底褲眼鏡布同埋底褲口罩添！

本以為對底褲造型產品已經有晒免疫力，唔會嚇到個心離一離，不過近期日本有人設計咗一款底褲造型新產品，的確好挑戰底褲！呀，唔係，係底線！

眼見冬天就到，推出冷帽是常識吧？雖然睇動漫成日會見到卡通人物會頭戴底褲通街走，但真正出現喺現實世界，成件事就勁癲！！！不過日本人都鍾意玩很大，所以真係有人實現咗底褲笠頭呢個idea。

日本一名時裝達人Korotoro，就趁住轉季推出底褲型冷帽。雖然睇落好變態，但Korotoro就表示戴上底褲型冷帽其實一啲都唔尷尬，因為呢啲就係Fashion。正所謂Fashion嘅嘢我哋識條鐵咩，所以唔明都正常嘅。

雖然呢款冷帽睇落同底褲冇分別，但話晒都係冷帽，採用嘅物料都會同底褲有分別。而且「褲頭」都會比一般底褲粗啲，真係有經過設計，唔係普通底褲咁簡單架！