「問我有沒有 確實也沒有一直躲避的藉口 非甚麼大仇 為何舊知己在最後變不到老友……」陳奕迅呢首《最佳損友》之所以咁深入Men心，相信都因為唔少人從歌詞中得到共鳴。想當年同班老死日日圍威喂早晚共對，促膝把酒傾通宵都不夠，但踏入20歲之後，生活繁忙，見返朋友時都會變得無言共對疏淡如水。

可能你只係20出頭，覺得人生正值搏殺期，為自己嘅將來而失去部分朋友，又算得啲咩丫！但事實係——缺乏朋友可以毀你一生。

一項研究調查指出，男人喺20歲時就會陸陸續續失去佢哋嘅朋友，得返12%嘅男士喺佢哋18歲後，仲有老死喺身邊。而超過25％的男士表示，佢哋好少聯絡朋友，一個月都未必會有一次；而9%男士表示，佢哋已經唔記得對上一次搵班Friend係幾時嘅事。但係根據世界衛生組織研究，如果生活中缺乏咗深厚嘅友誼，將來可導致抑鬱、焦慮甚至自殺。

可能好多男士都唔覺，一直認為我同班兄弟以前咁Friend，將來都一定會咁Friend！但其實友誼已經在悄悄變質，直到你人生遇上低潮，最需要好朋友撐你時，先赫然察覺，你身邊已經冇晒朋友。

點解20歲之後會有呢個轉變？根據全球慈善組織The Movember Foundation嘅調查顯示，20歲係人生嘅轉捩點。離開校園，踏入社會，開始為生活打拼，自然少咗時間同朋友玩樂。平常生活中所面對嘅人，大多係同事，脫離咗舊有嘅朋友圈子，友誼都好難去保鮮。就算你依然存在喺舊有嘅朋友圈，隨住大家嘅成長環境改變，思想都會唔同，可能會覺得，點解同朋友之間開始出現隔膜，大家嘅人生觀、價值觀會唔同咗咁多，而令你有陌生嘅感覺。

20歲後，改變嘅唔只係思想，仲有生活。以前後生，鍾意一得閒就集體活動，約埋成班Friend一齊出嚟玩，但出嚟做嘢後，就會開始變得獨立，更積極建設自己嘅未來。而且長大後，開始想建立自己嘅家庭，有咩重大問題，都會同最親嘅另一半講多於同自己班朋友講，呢段友誼嘅質素，自然大不如前。

如果巴打們覺得人生真係唔夠時間用，分唔到畀朋友，唔緊要，因為朋友重質不重量，只需要將少少時間同心思，分畀你最Close嘅兄弟，已經足夠。