網上唔少文章都同你講「錯失太易 愛得太遲」，所以要好好珍惜自己嘅愛侶，跟手教你十幾廿招點樣同另一半保持甜甜蜜蜜的N種方法、不要對另一半說的N句說話等等……一味教你點樣「愛」你嘅Honey，但偏偏我哋學識各種愛人技巧，取悅女朋友嘅同時，卻一直忽略如何去愛自己嘅父母。

基仔都有唱︰「日夜做 見爸爸 剛好想呻 卻霎眼 看出他 多了皺紋 而他的蒼老感 是從來未覺 太內疚擔心……」父母一直都係自己最親嘅人，由細到大都得到佢哋護蔭、包容，如此親密，自然會不自覺將負面情勢都發洩落父母身上，因為無論你點對父母，佢哋一定會依舊愛你。

特別係年青時，覺得自己大個仔，想要自己嘅私人空間，覺得自己可以搞掂一切，父母嘅說話都聽唔入耳，淨係覺得好煩好煩好煩好煩好煩，然後一句︰「得啦！」、「係喇！」、「知喇！」得埋去，可能你唔係刻意態度唔好，但往往呢種無心之言，都好Hurt父母心。特別係以下幾句，諗一諗，你有冇同父母講過？

「知嗱，咪咁囉嗦啦。」
正所謂「養兒一百歲，長憂九十九」，無論我哋幾歲都好，父母都會當我哋係小朋友咁，任何時候都呵護備至，提你早啲瞓呀、小心身體呀、著多件衫呀之類，就算知道你咁大個人，已經懂事，都係會忍唔住交代幾句，驚你一個不留神就整壞身子。但偏偏好多仔女都會覺得父母呢樣又提嗰樣又提，真係好Q煩，忍唔住一句得埋去，但其實，父母只係擔心你，聽多句對你都冇損失丫。

「講咗你都唔明架啦，唔好問啦。」
作為仔女，一定覺得同父母有代溝，除咗思想上有代溝，生活上都有好多溝通唔到嘅地方。例如電子產品，就係一個好例子。電腦、Smartphone等等理所當然要識嘅科技產品，對父母而言，可能好似太空船一樣咁難咁複雜，不過見你玩得咁開心，自然想參與話題，追上時下年青人嘅流行，同你搭得上嘴。如果呢個時候你咁同父母講嘢，會令佢哋覺得你同佢哋講多句都嫌煩，感到非常失落。其實回想返小時候，你咩都唔識，爸爸媽媽何嘗唔係耐心咁慢慢教你？點解大個咗父母想掉返轉向你請教時，你就要一臉不耐煩呢？

「咪話咗呢啲嘢唔要囉，做乜仲放喺度架？」
父母最開心就係睇住子女健康成長，但同時最難過嘅，係見到孩子長大後，愈漸遠離父母，真係非常矛盾。所以為咗緬懷仔女最黐身嘅時光，父母都好鍾意儲起我哋嘅舊嘢，即使我哋覺得啲嘢已經冇用處，甚至乎係壞咗爛咗理應要扔，父母都會唔捨得將佢丟棄。

「你哋舊嗰套唔Work架喇。」
老一輩嘅方式的確未必符合現今時代趨勢，但總有啲人生經驗係值得我哋參考。就算你由始至終都唔認同父母嘅一套，都唔好全盤否定佢哋，咁樣會令佢哋覺得同你有代溝之餘，都好似被時代淘汰一樣。

「叫咗你唔好整我啲嘢架啦！而家搵唔到喇！」
父母愛錫子女，所以會提供最好嘅生活畀孩子。見你間房亂，驚你行路Kick親，畀嘢撞親，搵唔到嘢，又或者亂糟糟會覺得唔舒服，於是就想幫你執得整整齊齊，企企理理，感覺更乾淨舒服。但呢一番好意，換嚟孩子嘅嫌棄，做父母又點會唔傷心呢。

「咩事呀？冇事咁我收線先喇。」
子女大咗，好多時都會離開屋企，過自己嘅獨立生活。雖然子女唔喺身邊，但作為父母，都會無時無刻記掛自己嘅孩子，所以就算冇特別事，父母都會想打畀你，聽聽你把聲，個心已經暖晒。平時你同朋友都可以傾偈傾得咁開心，點解一到父母想同你講幾句就要即刻唔耐煩呢？