雖然知條女句「我冇嘢喎！」實有啲嘢，但一個大話講100次，總會神推鬼㧬地錯以為真，就算你依舊清醒，但女朋友堅稱「我冇嘢喎！」，你都冇證據證明佢嬲而展開談判，呢個時候，你應該點做去打動企硬嘅女朋友，令佢軟化呢？

Mean娜作為一個女仔，可以畀少少溫馨提示巴打，其實女仔口是心非，好多時都係希望唔使自己講出口，對方都會明白自己諗緊咩。可能你會話，冇hits點知你嬲乜？係架，女人嬲嘅point男人未必知，但如果你從細眉細眼嘅事物，留意到女朋友嬲豬，女人一樣受落，因為女人呢個moment在乎嘅，未必係你能唔能夠成功氹返佢(其實女人自己都知，好多嘢都係自己攞黎嬲)，而係你緊唔緊佢，留唔留意佢。不妨試下透過小動作，搵出你女朋友嬲緊嘅徵象，話返佢知，你點解覺得佢嬲，證明你注意佢，關心佢，就好大機會可以打開佢心房，等佢話你知乜事。

咁通常女人嬲嘅時候，除咗講「我冇嘢喎！」仲會有咩特徵呢？外國網站askmen就列咗以下呢幾個point，男士們好快快手mark低佢喇︰

對方訊息變得好被動
平時成日主動搵你，但嬲嘅時候就會成日唔搵你，你搵佢先應下你。

回覆好簡短
平時回覆訊息都水蛇春咁長，仲要加晒emoji，但嬲嘅時候就一句起兩句止，離不開「哦」、「ok」、「係」呢啲極短句子甚至單字

應得好慢甚至已讀不回
平時訊息都會秒回，但嬲嘅時候就十世都唔應機，甚至明知佢睇咗個訊息都全無反應。

傾電話時對方一直唔多出聲
平時好多嘢講好多嘢呻，但嬲嘅時候十問九唔應，又唔多出聲，長期dead air。

同佢講嘢對方好似句句都有骨咁
「係咩？咁咪幾好囉～」、「開心啦你～」隔住個新界都聞到陣酸味

唔肯同你有親密接觸同眼神交流
當對方嬲緊嘅時候，想掂下佢都好似嫌你污糟咁，避開都算，仲要流露厭惡神色，眼尾都唔想望你

問佢嘢都係「是但啦」、「冇所謂啦」等等答案
擺到明唔想同你多講一句，淨係企圖敷衍應對就算

小事化大
小小事都要搞大件事，比如笑得大聲啲就話你好嘈；講多兩句又叫你收聲唔好咁煩

唔在乎你嘅感受
明知你唔鍾意嘅事又偏要做，好似存心整到你唔開心咁

用好中性嘅稱呼叫你
平時BB前BB後，而家就咁叫你個名，又或者直接喂你就算