唔講唔覺，原來《名偵探柯南》經已連載咗22年！呢22年來，粉絲一直等柯南剷除黑暗組織，變返工藤新一！可惜遲遲都未見家鄉，雖然青山老師話度定咗成個故事嘅結局，但一直沒完沒了嘅《名偵探柯南》，依然係讀者覺得要等到子孫燒書先有機會睇到Ending嘅漫畫Top10！

不過我哋呢班讀者更急都好，都心急唔過女主角小蘭。雖然連載22年來有好幾次安排柯南食錯嘢產生生理反應，變返新一，但每次都唔long-lasting，縮返做江戶川柯南呢個小學生，睇見新一同小蘭嘅「離離合合」，加上佢哋之間「這麼近那麼遠」嘅關係，真係睇到人勁心悒，有時不禁會諗，如果柯南一直變唔返做新一，咁佢同小蘭點算好呢……？

日本繪師すめらぎ琥珀（‏@sumeragitec）大概都非常擔心呢對青梅竹馬嘅未來，於是「出手相助」，喺Twitter創作出10年後柯南同小蘭二人嘅未來（睇到呢度有冇覺得畀Mean娜昆咗？係，所以「10年後的柯南與小蘭」並唔係官方故事，係同人創作XD我認我係標題黨，對唔住:p）

話就話新一身體倒退成小學生，但劇情中從來冇話佢停止成長，所以10年後，柯南照計係會健康長大，由於柯南同新一根本就係同一個人，柯南到17歲嘅時候，就會同當年17歲嘅新一一個餅印，再配上28歲嘅小蘭，其實唔係冇發展可能……

Source︰http://spotlight-media.jp/article/254406303140795437