成日都話唔好愛得太遲，對其他人係咁，對自己一樣都係咁。我知，呢個年頭講夢想講追夢好鬼老套，但好似尋日KB篇訪問話齋，如果唔襯你活著時想做就做，唔通要到你棺材蓋闔埋嗰刻，先嚟後悔自己未曾做過想做嘅事？未好好愛過自己、珍惜過自己嘅夢？

好多人都話，我唔係唔想追夢，但有好多顧慮同負擔，家庭啦、金錢啦等等，的確，太多因素阻礙我哋去實現夢想，但除咗呢啲客觀因素以外，你有冇畀過其他藉口自己，去逃避夢想這回事？唔好覺得呢個話題好似好遠，其實，我哋每個人唔多唔少都畀過藉口自己，去掩飾自己「唔敢做」嘅事實。

外國網路作家Elliott Morreau就寫咗篇「5 Terrible Excuses For Why People Let Their Dreams Go」嘅文章，去提醒我哋，唔好再畀以下藉口困住自己。

1.覺得自己未夠好
同大家分享個真實例子，其實Mean娜自己一直都好希望可以出書，之前同徐緣先生傾過偈，佢都有鼓勵我咁做，但我同佢講︰「我覺得自己未夠班，文筆等等仲好幼嫩。」但佢就同我講，而家大家冇寫開字嘅人都出書，我日日都寫文，個底已經比其他人好好多，加上紅唔紅得起，好多時唔係講實力，係講運氣，佢自己都係咁，所以唔需要過分質疑自己才能，覺得自己唔得、唔夠好blah blah blah，做咗先你自然會慢慢摸清條路點行會更好。

2.唔夠時間
一日得24小時，但時間就好似乳溝咁，擠一擠就會有。你話冇時間，但就有時間玩Pokemon go，咁會唔會係因為Pokemon go戰勝你嘅懶惰，畀你好大藉口話冇時間去實現夢想呢？

3.身邊人唔buy你
人係好易受影響，特別係親密嘅人例如家人、另一半、朋友等等，當人人都唔buy你嘅夢想，覺得踏踏實實打份工好過時，停一停，諗一諗，打份無聊工過世符唔符合你人物性格，真係唔追夢，你條氣又順唔順？人生係你自己，唔係別人，每個人都係獨立個體，細至食飯方式都唔同，更何況大至你嘅人生夢想？做咩要畀人哋笑兩笑就自動收晒皮先？

4.心態上未ready
其實從來都唔會有心態上ready嘅一刻，就好似淡咗要同另一半講分手咁，冇咩事你都係會一直拖一直拖，永遠未ready同佢講分手，但你一日唔踏出第一步，一日都唔會有轉變。與其一世都唔會ready，不如直接硬著頭皮做個決定。

5.自己呃自己
因為惰性而去同自己講︰「我盡咗力架喇」、「我已經做得好好架」，咁只會令你一世都唔再進一步向上努力，永遠原地踏步。唔好因為怕失敗會令你失望，而自己呃自己，試下再push自己去另一個層次去做得更好。