呢期仲係「Pokemon Go」嘅天下，為咗捉寵物小精靈，人類可以去到幾盡呢？有報導話，「Pokemon Go」令到唔少毒毒都願意面向社會，步出家門，威力仲強勁過阿爸阿媽熱血老師同社工，因為一個二個都要衝上街捉小精靈。

不過與其喺條街9行，倒不如坐住車捉小精靈來得更快升呢。但講到快升呢，車又點比得上Fap fap聲嘅直昇機呢？日本整形名醫高須克弥早前就喺Twitter出Post，預告自己將會帶住3部手提，搭直昇機喺天上捉寵物小精靈，結果引起唔少網民討論。