要同人解釋自己個名
通常啲人見你個名好特別，都會問︰「點解會改呢個名？係咪跟族譜？」但其實好多時都冇得解，多數係父母心血來潮……另外有時父母會用好少用嘅字幫自己改名，都要用一解釋一輪究竟個字係點讀。

講個名都好多話題
可以引起話題其實係好事，傾下有冇可能撞名，係咪好多人唔識讀等等，但對當事人少不免有啲尷尬，心諗︰唔好再討論我個名啦，講其他啦……

口頭登記姓名會好麻煩
有時唔係下下有紙筆畀你寫個名畀人，好多時都需要口頭登記，但個名太特別嘅時候，莫講對方load唔到你個名係點，連聽都未聽過個字又點登記，變相要你慢慢同佢講你個名係點寫先登記到……

上網一搵就搵中
唔少人都有偷偷上網search自己個名嘅癖好，如果你個名好common，上網一搵，可能會遇到好多同名同姓嘅人，可以八下其他相同名字嘅人究竟係點。但個名太特別，就唔會有撞名可能，上網一搵就搵到，畀人起底都特別容易。

羨慕其他人嘅名好普通
當自己個名太特別，唔好意思講出口時，就會好羨慕其他人個名平平凡凡……

Mean娜自己個名都好特別，以上情況都中過唔少，細個都有唔喜歡自己個名嘅時候，不過長大咗之後，就知其實自己個名好好，而且講過一次大家就會記得我個名，都算方便又快捷，科科。