早前網絡瘋傳一張西裝友跪地扭耳仔的照片，很多人立即問，究竟是唔夠數畀老細捽或者上司罰，還是因為得罪野蠻女友，慘遭遊街示眾？

如果你問我，本能又好，直覺都好，我都覺得係關男人事。

還以為自從14巴港女事件之後，惡女因為怕被偷拍起底而有所收斂，沒想到本性難移，又有巴打遭殃，不過肯定有女讀者會說，你怎麼可以假定相中男人清白無辜？可能他偷食在先，對不起另一半，又或者言而無信，所以才自食其果？

如果相中男人真的因為自己偷食犯錯而跪地求饒，當然罪有應得，不值得同情，只值得取笑和鄙視；但話分兩頭，如果他只是因為女人口中所謂「言而無信」，就要遭受如此對待，那倒是另一回事了……

女人最愛抽秤或者發圍的所謂言而無信，範圍其實很闊，你答應了放工順便替我去便利店買嘢儲印花但加班太晚太累忘了是言而無信，當年熱戀時答應過無論怎樣都一定會接電話不會miss call都可以說是言而無信，又或者明明表白時提過有結婚打算但至今仍未有時間表，也可以撥入言而無信list上，但三者程度根本就有著嚴重差異，你一句怪男人言而無信就發圍，要人地跪地餵豬乸，當街扭耳，算點先？

男人是社會性動物，重視社會地位與尊嚴，有咩習慣返屋企先講先嘈，但女人總是喜歡將所有嘢揚晒出嚟，連鬧交都要響最旺最多人地方嚟鬧嚟嘈，事無大小都鍾意搵埋啲姐妹八婆甚至陌生人一齊評理，彷彿要搞到個男人為你冇晒面，當街當巷出晒醜，你先feel到佢幾重視自己，先感到心甜……

尤其今時今日，打卡po文放閃咁方便，就算返到屋企，條女一樣可以公告天下，所以話，今時今日做男人，的確好蝕……

唉，老豆老母點解唔早啲生我地出嚟？