外國唔少人鍾意去露營，為嘅就係能夠遠離繁囂，感受一個大自然嘅寧靜，令平日營營役役嘅身心靈都能夠得到療癒。不過露營呢家嘢唔係個個識、亦唔係個個有時間、更唔係到到都有地方，所以有陣時睇人露營都一樣有同樣效果。就好似呢個日本Youtube頻道「Camp Rock」咁，無論你對露營有冇興趣都應該要睇下！

「Camp Rock」其實屬於近年日本非常流行嘅「唔出樣Youtube」，只不過係其他人就煮飯、打鼓，佢就去露營咁解。佢啲片閒閒地都30分鐘長，而且全程幾乎一句聲都唔出，成條片就係睇住佢紮營、生火、煮嘢食、再食埋。咁你可能會問，有咩好睇呢？一個原因當然係能夠聽到大自然嘅水聲風聲樹葉聲，另一個原因，亦係呢篇嘢屬於深夜系列嘅原因，就係因為佢啲鏡頭硬係唔覺唔覺就影住佢個心口，而佢又成日都著低胸背心仔，結果無論條片係邊個季節拍，你個Mon都係充滿春色！

圖片：截圖自Camp Rock

不過你又唔好以為佢真係掛羊頭賣心口，實際上「Camp Rock」每條片都會提供營地位置，又會提供埋片中用到嘅器具購買Link，而且佢露營技巧純熟、煮啲嘢食又真係好似幾好食，所以就算你唔睇佢個心口，當佢露營資訊咁睇一樣有所得著架！