唔記得邊個同我講過，如果有樣嘢令到你好痛苦，就千祈唔好逃避，要勇於面對同學識接受，只要你捱過咗，所有感覺都會煙消雲散。雖然我冇深究呢句說話嘅真實性，但見到新垣結衣結婚我就翻睇咗一次《逃避雖可恥但有用》，痛苦就冇減少啦，不過就發現女配角「内田理央」非常吸引。翻查資料後得知，原來佢就係《幪面超人Drive》入面嘅霧子Madam，平成「拉打女」之一。

今年29歲嘅「内田理央」，畢業於日本大學法學部經營法學科，2010年參加NTV女郎選拔賽出道。第一次做女主角就係出演《幪面超人Drive》，於劇中扮演特狀課女警，為「拉打」泊進之介提供協助。不過講到真正走紅，就係2016年出演《逃避雖可恥但有用》入面嘅主動女「五十嵐安奈」。

「内田理央」除咗活動喺影視界，同時亦係女性時尚雜誌「MORE」專屬Model，更拍過唔少水着寫真。雖然佢冇豐滿嘅上圍，但fit爆又均稱嘅身材卻顯得相當性感。佢曾經喺訪問自爆自己係一個宅女，平日最鍾意就係打機同睇動漫，係《JoJo的奇妙冒險》忠實粉絲，讀緊高中嗰陣就因為睇完《K-ON！輕音少女》而夾過Band，睇嚟佢真係一位相當稱職嘅動漫迷！

資料來源：twitter@lespros_rio、instagram@rio_uchida