近年各大品牌都鍾意出廣告互相「串」下對方促進良性競爭，繼Microsoft諷刺MacBook之後，近期Samsung新廣告就諷刺iPhone 12 Pro Max相機功能唔夠Galaxy S21 Ultra好，更揚言如果各位用戶想「升級」就應該係用Galaxy S21 Ultra，而唔係「降級」用iPhone 12。

今次Samsung針對手機變焦能力同像素兩方面諷刺Apple，從影片可以見到Galaxy S21 Ultra放大100倍後能夠影到月球表面嘅坑洞，而iPhone 12 Pro Max就只影到半粒黃色光點。

而像素方面，Galaxy S21 Ultra就配備1.08億像素主鏡頭，遠高於iPhone 12 Pro Max嘅1,200萬像素。片中可以見到兩者影同一個漢堡包， S21 Ultra影嘅相就放到好大都依然非常清晰，而iPhone 12 Pro Max放大少少就已經開始「朦朦哋」。

不過影相好唔好睇，向來就好主觀，亦涉及其他硬件因素，並唔係Zoom得遠同像素高就好睇，更何況Apple主打係成個Apple生態圈同用戶體驗，相信作為果粉嘅朋友唔會因為睇完兩條廣告就轉會（如果鬥Zoom得遠，華為都可以影到月亮）。但大品牌得閒互串下，促進良性競爭對用戶嚟講都係一件好事。