由秋元康所創立嘅第二個「AKB48」姊妹團「NMB48」差唔多有11年歷史，多年嚟培養過唔少甜美可愛偶像。除咗「渡辺美優紀」、「白間美瑠」、「上西怜」等代表人物之外，其實仲好多有潛力嘅現役成員，就好似今日介紹嘅「安部若菜」。

今年20歲嘅「安部若菜」，2017年參加NMB48選秀大會出道，憑住甜美鄰家女孩形象吸引粉絲關注。而且佢讀書都唔差㗎，高中畢業後就考入關西大學經濟學院，上年首次挑戰水着寫真嗰陣更被日媒形容為「知性性感」，成為一時佳話。

除咗偶像工作之外，「安部若菜」私底下係一個ACG迷，平時除咗鍾意睇動漫，仲開咗個YouTube Channel直播打機，上星期先同隊友「山本望叶」一齊直播玩《Final Fantasy VII 重製版（FF7R）》。