唔經唔覺，當年喺日劇版《死亡筆記》飾演彌海砂嘅「佐野ひなこ（佐野雛子）」已經出道10年。雖則佢曾經沉寂過一排，但自從前年回歸寫真界後就狀態大勇，連番登上雜誌又推寫真集，而慶祝出道10周年嘅最新作《BE WITH ME》亦會喺下個星期正式推出。

今年27歲嘅「佐野ひなこ」，早喺2012年參加Horipro試鏡活動成功打入決賽出道，早期以時尚Model工作為主，更擔任過著名女性雜誌《ViVi》專屬Model，後來憑住索爆身材殺入埋寫真界，人氣有增無減，亦因為咁而多咗機會參演日劇同綜藝節目，當中就包括為人熟悉嘅日劇版《死亡筆記》。之不過後來沉寂咗一段時間，直到前年先重出江湖，但身材依舊性感火辣，仲好似比以前更Fit。