今晚嘅深夜系列同大家睇啲新嘢，因為今日我哋唔係介紹任何一個真實存在嘅美女，而係介紹一班存在於二次元嘅美女；但呢班二次元美女嘅出身亦都唔簡單，因為佢哋係AI根據人類喜畫出黎嘅！

卻說於Twitter上有一位外國畫師「Coco (@setawar)」，佢喺上週末就分享咗一系列油畫風格嘅美女作品，畫中嘅女仔靚女得黎身材仲要勁好，結果於日本網絡掀起一股熱話。但更驚人嘅係，其實呢系列作品都唔係「@Setawar」親手所畫，而係佢利用繪圖AI「Stable Diffusion」，輸入關鍵字之後AI自動生成出黎！換言之係AI覺得你班人類應該會鍾意呢類型嘅女仔，所以就整咗堆咁嘅圖出黎。

雖然仔細睇嘅話，依然能夠搵到畫作中不完美嘅地方，例如某啲身形比例有啲奇怪，畫中人亦經常有六隻手指，但我只能夠講AI比起我阿媽都仲要了解我呀！

事實上「AI涉獵藝術創作」乃係近來嘅熱門話題之一。早前美國有位Jason Allen利用 AI 繪圖工具「Midjourney」創作出一幅名為「空間歌劇院」嘅電子畫，更於科羅拉多州博覽會舉辦的「Fine Arts Exhibition」美術展獲獎而引起爭議，依家又有「Stable Diffusion」創出作令所有男人都心動嘅女性畫作，你話如果有一日，AI發展到唔止識得畫個靚女出黎，而係能夠令相中人成為摸得到嘅機械人偶…佢送10個畀我嘅話，我願意支持佢統治地球！

資料來源：ChromedSets