講起我哋MenClub嘅成名作，當年遠赴日本搵「乳神」杉原杏璃做訪問都算係其中之一。而且唔知係好彩定唔好彩地，喺我哋做完訪問之後兩年，佢就正式從寫真界引退，後來仲做咗人妻。不過杉原杏璃早兩年離婚，近日更復出以四十歲之齡推出寫真集！

杉原杏璃新寫真

杉原杏璃早前宣佈，會於本月27日推出新寫真集《それから、》，乃係佢退出寫真界5年後首次拍攝寫真，同上一本寫真更加相隔六年半。杉原杏璃接受訪問時表示，當年引退其實係為咗結婚，事實上佢亦於引退一年後與音樂出版代表結婚，可惜婚姻僅維持兩年就於2020年結束。事業方面，廿幾歲就開始投資股票嘅佢，早早就已經係億萬富翁，引退後亦轉行做投資家，更出過書教人投資，所以今次復出絕對唔係因為錢，而係想重溫一下拍攝寫真嘅快樂，希望大家再次讚佢「卡哇兒」。

杉原杏璃舊寫真

引退咗5年，杉原杏璃亦已經40歲，再加上過去幾年疫情冇得出街，佢表示身材其實已經大走樣，肥咗5kg、條腰都粗咗幾吋。所以佢為咗拍攝寫真，就食咗三個月菜、蘑菇同豆腐，最後佢覺得自己身材有90分。另外佢亦提到2023年嘅目標係結婚，表示生命無Take 2，隨時都有機會死，所以佢只係想做自己想做嘅事。

IG：anri.sugihara.anri