黃子華話齋，落咗妝人定仲認得你嗰啲先叫「化妝」，落咗妝冇人認得你嗰啲叫「喬裝」。不過作為男人，好多時都只係睇到出女仔個妝濃唔濃 (甚至大部份人其實淨係睇得出眼妝)，係冇辦法想像佢落咗妝係咩樣。就好似今晚要介紹呢位「山田麗華」咁，你睇佢IG以為佢係辣妹，點估到佢淡妝可以咁GF-able？

現年20歲嘅山田麗華，最早於2018年出演日本網絡戀愛綜藝《今日、好きになりました。》而出道，同年佢就成為日本著名「涉谷系」女性雜誌《Popteen》嘅專屬模特兒，2020年轉會到同樣走濃妝抹艷風格嘅《nuts》，所以如果你去睇佢個IG，就會發現佢平時嘅打扮其實都係走Color Con、長睫毛、粗眼線嘅「重妝」路線。

不過！近來佢就分別為《Young Magazine》以及《週刊Playboy》影咗兩輯寫真，當中一改以往嘅艷麗妝容，改為淡妝上鏡，瞬間就就由辣妹搖身一變，成為面口善良、事業線長嘅清純可愛妹妹，令人眼前一亮！唔知大家又鍾意佢邊款打扮呢？

IG：_reistagram._