雖然話現代人越黎越遲婚，但「遲婚」並唔代表「不婚」，特別係唔少女仔始終都對成為人妻抱有憧憬，就連上星期迎來31歲生日嘅日本知名寫真女星「出口亜梨沙」都唔例外。早前佢為咗宣傳個人第三本寫真集而接受訪問，就話雖然覺得機會唔大，但其實佢係想34歲前結到婚！

9月18日迎來自己31歲生日嘅「出口亜梨沙」，乃係目前日本寫真界最出名嘅「輕熟女寫真偶像」之一，但其實佢加入寫真界嘅日子並唔算長。大阪府出身嘅佢，一開始入行其實係做日本電視「情報番組 (即資訊節目)」嘅記者出身，後來因為明明包到實一實都遮掩唔到嘅好身材，於是被封為「巨乳記者」，2017年中乾脆辭去記者工作進軍寫真界，人氣再進一步，更開始出演劇集、電影及舞台劇，星路都可以話頗為順利。

而為咗紀念進入「三字頭」，佢於上週31歲生日正日就推出個人第三本寫真《Essence》，當中嘅主題就係「成年之愛」。而佢於接受訪問時就提到，其實佢好想結婚，但過去嘅感情生活都唔太順利，每段關係都唔長久。佢話雖然自己係想34歲之前結到婚，但目前睇黎自己距離結婚仲相當遙遠，佢甚至笑稱「我冇見過啲話自己想幾多歲結婚嘅前輩，真係可以喺嗰個歲數結到婚，所以我好擔心呢！」

IG：arisa_deguchi