唔知大家有冇留意，明年1月26-28日台北松菸文創區將會舉行「台灣寫真博覽會 (TSE)」，主辦單位近來亦開始擠牙膏式公佈參展女星，當中除咗如「涼森玲夢」、「伊藤舞雪」等日本女優；「辰辰」、「啾啾」等台灣本地寫真明星，以至韓國著名網紅「Bitnara」等之外，當然唔少得日本寫真女星參加。而今日為大家介紹嘅呢位「篠見星奈」，就係其中一位啦！

現年24歲嘅「篠見星奈」來自日本北海道，最早於2018年參加女子偶像團體「Nicedice」出道，但不足一年團體就宣告解散，「篠見星奈」亦成為自由身模特兒。後來於前事務所所長建議下，於2021年進軍寫真界，並於2022年4月推出首隻寫真DVD，旋即成為Amazon嘅銷量冠軍。同年佢參加由少年雜誌《Young Champion》舉行嘅「Miss Champion選美比賽」獲得準優勝，再於《週刊Playboy》編輯部選出嘅「新世代寫真女星番付」獲選為「西大關」，年尾仲於「年度寫真女星賞」拎到新人賞，可見佢嘅寫真表現有幾優秀。

話雖如此，但目前「篠見星奈」登上雜誌嘅機會仲係唔多，換言之如果大家想睇高清大圖嘅話，其實唔多選擇；但另一邊視，正因為佢冇咩上雜誌嘅機會，所以佢好落力於IG、X (Twitter) 上發佈自己嘅性感相，所以如果你係鍾意碌IG嘅，就應該睇得相當開心。如果大家都想見下佢真人嘅話，或者就要考慮明年去台灣觀展啦！

IG：shinomi_seina