男人，通常都係膚淺嘅。我哋會留意到一位女性，絕大多數情況下都因為佢嘅外貌或者身材；但男人，同時係複雜嘅，因為我哋要愛上甚至仰慕一位女性，好多時都係因為對方嘅才華。咁你話呢個世界有冇一個才貌俱全嘅完美嘅女性？有！而今晚要介紹嘅呢位「青戸しの」就可能係其中一個。

現年23歲嘅「青戸しの」，自2018年即係佢17歲時就開始作為模特兒活動，並憑住佢嘅外貌以及「令人難以捉摸嘅氣質」火速走紅，曾經創下一個月有100個攝影邀約嘅紀錄。身高達174cm嘅佢亦深受雜誌及品牌喜愛，為佢哋拍下唔少時尚美照。不過佢更特別嘅身份，就係一名作家。目前佢於講談社旗下嘅《小説現代》有連載緊懸疑、恐怖小說、又有於女性雜誌《ar web》經營一個解答女性疑難嘅專欄，仲曾於雜誌訪問中表示自己希望寫劇本。另外佢近來仲開始踏足寫真界，絕對係一位才藝俱全嘅女性。

佢於訪問中說道，小時候放假佢爸爸就帶佢去書店揀三本書，然後就搵間Cafe坐低慢慢睇足成日。雖然佢都曾經想去公園玩，但當培養出閱讀習慣之後，佢就慢慢從中搵到樂趣，亦為佢鋪就目前嘅作家之路。至於點解一個靚女要寫懸疑恐怖小說呢？佢就話因為自己鍾意「於現實世界體驗唔到嘅刺激感」。

IG：aotoshino_02