現年24歲嘅「川津明日香」，早於14歲時就成為時裝雜誌專屬模特兒而走紅，2020年時更因為拍攝《幪面超人聖刃》成為當紅女星，隨後亦專心發展演員事業。近日佢再次登上《Flash》拍攝寫真並進行訪問，並透露出佢不為人知嘅一面：原來佢好飲得！

話說「川津明日香」早前為《Flash》拍攝新寫真兼做訪問，當中佢除咗提及當年14歲與媽媽於原宿行街被星探發掘，後來成為模特兒再轉戰戲劇嘅經歷之外，佢仲提到自己好鍾意飲日本清酒而且仲好飲得。據佢自己講，無論飲幾多都好，佢都唔會「斷片」失去記憶，而且第二日起身亦唔會有任何宿醉嘅感覺，連佢自己都覺得自己酒量有啲太勁。

佢亦提到訪問前幾日，佢同朋友兩個人去居酒屋飲酒，結果兩個人飲完再點、飲完再點，飲到居酒屋嘅服務員都嚇親阻止佢哋繼續點。到要走嘅時候佢又因為唔想Keep酒喺居酒屋，結果將剩落黎嘅清酒一嘢乾咗。不過佢最終亦付出代價，因為飲得太醉所以離開居酒屋落樓梯時PK，仆損咗個滕頭。佢本人就對於皮外傷不以為然，唔知你聽到又會唔會戥佢心疼呢？

IG：asuka_kawazu