作為偶像成員，最正常嘅走紅方法可以靠台上表演、可以靠美色、可以靠經營社交平台，但今晚要同大家介紹嘅呢位「琴吹ゆず」，近日就靠住一個非常特別嘅方法一炮而紅，而佢嘅方法就係Cosplay一隻連樣都見唔到嘅鴕鳥。

ダチョウの人って呼んでいいよ pic.twitter.com/hcdnP1ToAs

— 琴吹ゆず(RiNCENT♯） (@rincent_yuzu) July 22, 2024

話說「琴吹ゆず」早前於X（Twitter）上傳咗兩條佢於動物園嘅鴕鳥面前扮鴕鳥嘅影片，片中嘅佢用T恤笠住上身，向前彎腰，再向上伸出右手模仿鴕鳥嘅頭頸前後擺動，陽春得黎又非常神似，從片中可見似乎連真鴕鳥都被佢呃到，不停跟住佢隻手前後擺動。呢條有趣短片好快就於日本網絡瘋傳，到撰文之時已經有超過4200萬次觀看，亦令「琴吹ゆず」一夜成名。

而當你進一步了解「琴吹ゆず」，就會發現目前屬偶像團體「RiNCENT♯」成員嘅佢其實係一個氣質靚女，與片中嘅搞笑形象有強烈對比。X上嘅性感可愛泳裝照更立即迷倒唔少人。不過你唔好睇佢可可愛愛咁就以為佢係個小妹妹，據網民整理出黎嘅資料，1995年出世嘅佢今年已經29歲，於家鄉茨城縣讀完營養管理後，為咗尋求藥店工作而前往東京，機緣巧合之下於2020，即係佢25歲時先偶像出道，依家走紅都算係大器晚成啦。

IG：rincent_yuzu